عمرة ترانزيت من مصر ٢٠٢٤
عمرة ترانزيت من مصر ٢٠٢٤
بسم الله الرحمن الرحيم
أولا لازم حضرتك تكون عارف انك علشان تدخل أي بلد محتاج تطلع تأشيره
معظم التأشيرات بتحتاج باركود ما عدا التأشيرة التجاريه والعائليه وتأشيرة المرور
يعني ايه تأشيرة مرور ؟تأشيرة بتسمح لك بدخول السعوديه لمدة ٤ أيام ولكن بشروط
شروط تأشيرة المرور - انك تكون مسافر من بلد (مصر مثلا) ومتجه الي بلد تانيه (الاردن مثلا) وتعدي علي السعودي تقضي فيها ٤ أيام
- انك تكون حاجز علي شركة طيران سعوديه (الطيران السعودي او طيران ناس)
- انك تقضي فقط ٤ أيام في السعوديه
- التأشيره بتستخدم في خلال ٩٠ يوم من اصدارها
- تأشيرة المرور بتتيح لك رسميًا اداء العمره
- التأشيره بتطلع لكل الاعمار ، للطفل من عمر يوم حتي كبار السن
طريقة الحصول علي تأشيرة المرور : - الطريقة الاولي : من خلال حجز رحلة ترانزيت علي موقع الطيران السعودي ويتم التقدم بطلب الحصول علي التأشيره قبل الدفع
- الطريقه الثانيه : بعد اتمام ودفع حجز رحلة وجهات متعدد علي طيران ناس
طيب انا عايز اعمل عمره ٤ اياميبقي حضرتك لازم تمشي خطوات الحجز صح الموجوده في شروط التأشيره علشان تقدر تطلع التأشيره وعلشان تقدر تعدي في المطار حتي لو مش هتسافر البلد التالته (الوجهة التالته)
الوجهة التالتهطيب يعني ايه بقي الوجهة التالته ؟
الوجهة التالته دي المفروض انها البلد اللي حضرتك مسافر لها اصلا مرورًا بالسعوديه
طيب انا هسافر الوجهة التالته ؟
علي حسب رغبتك ، بس لو مش حاجز الوجهة التالته مش هتخرج من مطارات القاهره
اشمعني الاردن !؟
الاردن مش بتطلب مننا كمصريين تأشيره قبل السفر وكمان أسعار تذاكر الطيران من مطارات السعوديه الي الاردن رخيصه
طريقة الحجز الصحيح - الطيران السعودي :
للأسف الباقات الاقتصاديه غير متاحه في الوقت الحالي ،هحاول اشوف افضل طريقه حاليًا واضيفها للبوست
- طيران ناس :
حجز (((وجهات متعدده)))
رحله (١) : القاهره > جده او المدينه
رحله (٢) : جده او الرياض او الدمام او المدينه > عمان (AMM)
بعد اضافة تفاصيل الركاب ودفع ثمن التذكره سيتم فتح التذكرة مباشرة وبها رابط الحصول علي تأشيرة المرور
بنملي البيانات ونتأكد منها كويس جدا لأن غير متاح التعديل فيها لو في خطأ وبعد كده بندفع وبنحمل التأشيره
بعد كده حجز منفصل ذهاب فقط : جده او المدينه > القاهره علي اي شركة طيران
مش مطلوب عوده من الاردن لمصر
ملحوظات هامة عند الحجز : - الرحله (٢) في خلال ٩٦ ساعه من وصول الرحله (١) (ارخص سعر تلاقيه)
- حجز الرحله ٢ ضروري فقط كإجراء روتيني لكن فعليا مش بنسافر الاردن
- حجز العوده بنراعي اننا منعديش ال ٩٦ ساعه لأن دخولك في اليوم الخامس هيعرضك لغرامه او الحرمان من دخول السعوديه مره اخري
- عند الحجز بنلغي (لايت فيلكس ،الرسائل النصيه ،زجاجة المياه ،تحديد المقاعد) بتوفر حوالي ٧٠ ريال
- الدفع من خلال كارت المشتريات
- غير متاح الدفع بكارت الخصم الفوري
- لو حضرتك بتحجز لاكتر من شخص هتضطر تحجز لكل شخص حجز منفصل علشان ليميت الڤيزا
- الوثيقه هي جواز السفر ، رقم جواز السفر مكتوب فوق عاليمين بيبدأ بحرف A
- الايميل اللي هتسجله هيجيلك عليه الحجز والتأشيره
- متلبخش نفسك بتسجيل الحساب (الايميل والباسوورد)
- ضروري جدًا اختيار الجنسيه المصريه علشان في ناس بتنسي وتسيبها سعوديه وكده مفيش تأشيره طبعا
- ضروري جدًا تحتفظ برقم الحجز (صوره عالموبايل)
ملحوظات هامة عند اصدار التأشيره :
- بنختار جواز السفر : عادي
- نعم أرغب بأداء عمره
- صلاحية التأشيره ٩٠ يوم
- مدة الاقامة ٤ أيام
- الصوره لازم ٢٠٠ * ٢٠٠ بيكسل وحجم أقل من ١٨ كب ودي نكون مجهزينها من بدري
- متطلبات السفر والاسئله الامنيه بنسيبها ذي ما هي
- تكلفة اصدار التأشيره حوالي ٩٥ ريال وسعرها بيزيد مع أهالينا كبار السن
لو التزمت التعليمات اللي فوق دي بالظبط فكده حضرتك معاك حجز سليم ١٠٠٪ يشمل الوجهة التالته والتأشيره تطبيق نسك : - حضرتك بتشوف الميعاد المتوقع لأداء العمره وبتعمل تصريح أداء عمره (احتياطي) وطبعا بدون اي رسوم
- حضرتك لو هتروح المدينه وناوي تزور الروضه الشريفه لااااااااازم تعمل تصريح زيارة الروضه
- أفضل ميعاد لحجز الروضه للرجال قبل صلاة الفجر مباشرة علشان تقعد اطول فتره وكمان تصلي الفجر
- مواعيد زيارة الروضه بتفتح أسبوعيا ،حضرتك بتفتح التطبيق يوم الجمعه اللي قبل السفر مباشرة وتدخل تحجز عليه بدون اي رسوم
الانتقالات الداخليه : - من مطار جده الي مكة قدامك ٣ طرق :
١ - التاكسي وده متوسط الفرد فيه ٤٠ ريال والمفروض يوصلك عند باب الفندق وهتلاقيهم كتير جدا اول ما توصل المطار
٢ - قطار الحرمين الشريفين وتقدر تدخل علي التطبيق او الموقع بتاعهم تشوف المواعيد والاسعار وخلي بالك ان الحجز المسبق اون لاين أرخص من الحجز عند الوصول (ده مش أفضل حل لأنك هتضطر تاخد تاكسي تاني من محطة القطار للفندق)
٣ - باص نورث ويست بيطلع تقريبا كل ساعه وده تكلفة الفرد فيه ٢٥ ريال واحيانا ٣٠ ريال وبيوصلك عند موقف جرول بمكة
- من المدينه الي مكة او العكس
١ - أفضل وسيله هي قطار الحرمين وده بنحجزه اونلاين برده بكارت المشتريات وسعر التذكره فيه ١٧٢,٥ ريال وبيزيد كل ما الميعاد بيقرب
٢- طيب القطار غالي ، في مواصلات بالفرد في حدود ٤٠ : ٥٠ ريال من موقف جرول
الفنادق : - مواقع حجز الفنادق ذي بوكينح
- شركات السياحه
- الوسطاء
- الحجز من الفندق مباشرة
الريالات :- الصرافه بيغيرلك لحد ١٠٠٠ دولار
- البنك قبل السفر ب ٤٨ ساعه ولازم حضرتك تكون عميل في البنك وخد معاك جواز السفر والتيكت وتصريح العمره بتاع نسك
الشنط : - ٢٠ كجم في بطن الطياره
- ٧ كجم في ايدك
مياه زمزمزجاجة ٥ لتر معبأه مخصوص للسفر الجوي موجوده في المطار ب ١٢,٥ ريال
في حالة ان المسافر شخصيا معاه ڤيزا مشتريات ييكلم البنك قبل السفر يفعل الڤيزا للاستخدام الدولي ورفع الليمت (علي حسب نوع الڤيزا) وبعد ما بيرجع بيروح البنك يالجواز يشوفوا اختام المغادره والوصول لو ربنا كرمك ووفقك واختارك من ضمن ملايين المسلمين علشان تعمل العمره يبقي ده فضل كبير من عند ربنا عليك ، اوعي تضيع نفسك وتفوت تكبيره واحده في الحرم وحاول تستغل كل لحظه في العبادهملحوظه مهمه : - أي حد يقولك ان تأشيرة المرور متوقفه او فيها مشاكل تعرف علي طول انه انسان ضلالي او بيفتي عن جهل
- فقط في بعض الاحيان بيكون في ضغط علي الموقع أثناء فترة العروض وبعد الضغط ما بيخف المشاكل بتتحل والتأشيرات بتطلع ولو لا قدر الله التأشيرة مطلعتش وحجزك سليم شركة الطيران بترجعلك فلوسك كرصيد عندهم تقدر تعيد بيه الحجز مره أخري وفلوسك مش هتروح عليك
ملحوظه مهمه : ابعد عن الفتره من (١٥ ذو القعده حتي ١٥ ذو الحجه)
علشان الفتره مخصصه لإستقبال حاملي تأشيرات الحج
العمره الترانزيت بتتكلف كم ؟ حضرتك بتكلف رحلتك وبتطبخها علي ايدك
الطيران :
ممكن تكون مسافر عالطياره وحاجز ب ٢٦٠ ريال واللي جانبك حاجز ب ٦٠٠ ريال (فرق توقيت الحجز)
طبعا كل ما حجزت بدري هتجيب سعر أرخص وطبعا ده بينطبق عال٣ رحلات (الذهاب - الوجهة التالته - العوده)
واحد حاجز أثناء فترة العروض وواحد حاجز بره العروض
واحد قعد يتشقلب في الموقع لحد ما جاب ارخص سعر وواحد تاني حجز اول سعر شافه
واحد مقيد بمواعيد محدده وواحد تاني بيدور علي ارخص سعر بدون قيود في المواعيد
واحد هيطلع من مطار القاهره والتاني هيطلع من سفنكس
واحد حاطط المدينه في الذهاب او العوده والتاني مش هيروحها
كل اللي فات ده فرق تكلفه في سعر تيكت الطيران فقط
الانتقالات :
في اللي هيركب تاكسي وفي اللي هيركب مواصلات وفي اللي هيركب القطار
وفي اللي هيركب تاكسي لواحده واللي هيركبوا تاكسي ٤ أفراد
المدينه المنوره :
في واحد هيروح المدينه رايح جاي
في واحد هيبات في فندق
في واحد هيرجع من مطار المدينه
في واحد مش هيروح خالص
الفنادق :
واحد هيقعد في فندق ٥ نجوم اول مطل عالحرم
وواحد هيقعد في العزيزيه
وواحد هيقعد علي بعد ٥٠٠ م
واحد هيشيل الغرفه لوحده
والتاني هيقعد في غرفه رباعي
أسعار الفنادق نفسها بتتغير مع زيادة الاقبال في المواسم
علشان كده مفيش سعر ثابت لتكلفة الرحله وكل واحد بيكلف رحلته علي ايده
واوعي تنساني بدعوه حلوه 
اللهم اجعل هذا العمل خالصا لوجهك الكريم واكتب له القبول والنفع
تعليقات
إرسال تعليق